Það er æfing hjá 7.fl. í Risanum í dag kl. 5 og ætla stelpurnar úr Grindavík að vera með okkur á æfingu.  Munið að mæta tímanlega - vera í FH-treyjunum þið sem eigið (annars fáið þið hjá okkur) og hafa með ykkur vatn í brúsa

Okkur var að berast þessi tilkynning frá unglingaráði og athugið að þær sem verða 6 ára á þessu ári fá niðurgreiðslu.

Kæru foreldrar og forráðamenn



við viljum minna ykkur á að skrá iðkendur í Íbúagátt Hafnarfjarðar fyrir 15. febrúar næstkomandi sem er undir www.hafnarfjordur.is

Tímabilið sem um ræðir nú er janúar til maí.



Mánaðarleg niðurgreiðsla er kr. 1.700 fyrir 6 ára til 12 ára og kr. 2.550 fyrir 13 til 16 ára og miðað skal við fæðingarár.

Öll börn sem eru fædd árið 2006 eða fyrr fá því niðurgreiðslu.



Með bestu kveðju

Stjórn BUR

Þið voruð rosalega flottar í æfingaleikjunum í dag, verst hvað það er alltaf kalt þarna en þið hlaupið ykkur bara til hita.  Ég heyrði að það hafi gengi mjög vel hjá öllum hópunum, allavega voruð þið brosandi og alsælar eftir leikina og stelpurnar í Breiðablik voru líka alsælar.  Þær ætla svo að bjóða okkur einhverntíma í heimsókn til þeirra.

Við höldum áfram að æfa og æfa, þá tökum við svo miklum framförum og næsta æfing er á morgun - fimmtudag kl. 5 í Risanum.

Nú er ég í slæmum málum því búið er að ákveða að loka blogcentral sem ég hef notað síðustu 10 ár til að vera í sambandi við stelpurnar og foreldra - þeir segja að það hafi dregið svo úr notkun og því verður þessu lokað.  Ég er svo heppin að ég er með ungling á heimilinu sem benti mér á að það væri ekkert vit í öðru en að opna síðu á facebook, ég veit varla hvað þetta er!!! En hún er semsagt búin að opna síðu fyrir 7. og 8. fl. og er að senda vinabeiðnir í allar áttir.  Að sjálfsögðu eru ekki allir á facebook (eða hvað!!) þannig að við verðum að finna önnur ráð til að vera í sambandi við þau, þið megið láta mig vita ef þið eru ekki á facebook. Við erum bara með lista yfir þær sem eru á skrá hjá félaginu þannig að ef þið eruð ekki að fá vinabeiðni þá gæti verið að dóttir ykkar sé ekki skráð og bið ég ykkur að ganga í það sem fyrst.  Ég á svo eftir að læra á þessa síðu - mér er sagt að þetta sé gaaaaaasalega sniðugt

8.flokkur - æfing í Risanum þriðjudag kl. 5 og kl. 13 á laugardag í Víðistaðaskóla.

7. flokkur - æfingaleikur í Risanum á miðvikudag kl. 5 - 6, stelpurnar í Breiðablik koma í heimsókn,  munið að mæta tímanlega, vera í FH-treyjunum þið sem eigið annars fáið þið eina hjá okkur.  Muna að klæða sig vil og taka með sér vatn.

Æfing á fimmtudag og laugardag og svo förum við í heimsókn til Valsstelpnanna n.k. sunnudag - inni í Hlíðarenda kl. 10 - 11:30. 
Ath. ég var að fá póst frá valsþjálfaranum og sagði hún að við yrðum að fresta heimsókninni til þeirra þar sem það er handboltamót í húsinu - við förum bara seinna.

Mig langar að biðja þá foreldra sem enn eru ekki búnir að skrá dóttur sína að gera það sem fyrst (fara inná fh.is og þar er gluggi þar sem stendur skráning í Nora).  Mér telst til að það séu um 8 stúlkur að æfa sem eru óskráðar og skiptir þetta auðvitað miklu máli fyrir hópinn því það er farið eftir fjölda skráðra þátttakenda þegar verið er að raða niður fjölda þjálfara á hópana, stærð æfingasvæðis sem hóparnir þurfa og að sjálfsögðu er það skilyrði að það sé hægt að ganga frá launum til þjálfara að foreldrar greiði æfingagjöld.  Endilega þeir sem ekki eru búnir að skrá dóttur sína gangi í það núna

Það eru nokkrir foreldrar sem hafa tekið sig saman og ætla að halda fjáröflun fyrir flokkinn 16. feb. en þá ætla þau að vera með bingó í Kaplakrika.  Endilega allir að taka frá þennan fimmtudag milli kl.5 og 7.  Þá er ætlunin að bjóða allri fjölskyldunni og öllum sem áhuga hafa á að mæta í bingó og verða örugglega margir góðir vinningar, en þetta verður auglýst betur þegar nær dregur.  Ef þið foreldrar hafið tök á að leggja eitthvað til í vinningum þá endilega hafið samband við Kolbrúnu Hauks. (mömmu Emblu) í síma 8211397.

Legghlífar í óskilum/hafa víxlast.  Ég er með einar litlar FH-legghlífar ómerktar sem einhver á og trúlegast er sú með of stórar FH-legghlífar, það gæti verið að þær séu merktar Hrefna.  Viljið þið athuga hvort dóttir ykkar gæti verið með legghlífar sem eru of stórar og þá er ég með hinar minni. Einnig er ég með litlar Puma-legghlífar sem einhver hefur gleymt fyrir þónokkru síðan. 

Það er gaman að geta þess að það eru ekki allar sem skilja orðið legghlífar og setja þá bara inn orð í staðinn sem þær þekkja og líkjast þessu blessaða orði og tala sumar um að setja á sig regnhlífarnar og enn aðrar sem setja á sig fallhlífarnar

Það gekk aldeilis vel hjá ykkur í dag stelpur, þið svo glaðar og ánægðar og leggið ykkur alltaf alveg 100% fram.  Það er svo gott að fá svona æfingaleiki því þá sjáum við þjálfararnir svo vel hvað þið eruð búnar að læra mikið og hvað við eigum að leggja mesta áherslu næst í þjálfuninni.  Við höldum áfram að bæta okkur og munið að Breiðablik kemur til okkar næsta miðvikudag og trúlega Grindavík þarnæsta því þær komust ekki í dag vegna veðurs.

  Allavega þá er æfing hjá okkur í Risanum á morgun kl. 5 - ekkert fótboltafæri úti enn

Stelpur - við viljum minna ykkur á að stelpurnar frá Grindavík og Haukastelpurnar koma í heimsókn til okkar í Risann á miðvikudag kl. 5 - 6.  Þið klæðið ykkur rosavel og eruð svo í FH-treyjunni utanyfir (þær sem eiga ekki fá hjá okkur), hafið með ykkur vatnið góða og ekki gleyma vettlingum og húfu Við komum til með að spila á litlum völlum - 5 á móti 5 og skipta ört. Gott að mæta tímanlega - sjáumst eldhressar í kuldanum

Stelpurnar ykkar voru alveg frábærar á "X-factor" skemmtuninni í dag og alveg ótrúlegt hversu ófeimnar þær eru að koma fram, búnar að leggja á sig miklar æfingar, finna til leikmuni, æfa texta,  leikrit og dansa - það þyrfti að vera annað svona kvöld fyrir foreldra, aldrei að vita að við getum komið því við. 

 Við höfum verið að halda svona skemmtanir í gegnum árin 2 - 3 x á ári og alltaf verið mikil tilhlökkun í hópnum.  Í dag fékk ég í fyrsta skipti ábendingu frá foreldri að þetta væri kannski ekki hentugt fyrir svona ung börn þar sem sumir ganga út með verðlaun og önnur ekki.  Að sjálfsögðu er ég þakklát að foreldrar hringja og láta í ljós sína skoðun því ekki er hægt að breyta eða laga til batnaðar ef enginn segir neitt.  Þegar við fórum af stað með þetta á sínum tíma var tilgangurinn að stelpurnar kynntust hvor annari á annan hátt en á vellinum, þetta þjappar líka hópnum saman því þær eru oft að æfa atriði í marga daga sem er mjög gott hópefli.  Við höfum hvatt þær til að koma fram og allar fengið einhver "verðlaun" (sem í dag var marndarína) fyrir það og svo hefur verið 2 - 3 fullorðnir  í dómnefnd sem hafa valið 3 - 4 atriði sem hafa "skarað fram úr" að þeirra mati og þau atriði fengið eitthvað aðeins meira en hinir.  Það er að sjálfsögðu ekki gott að vita til þess að sumar fari grátandi heim af svona "skemmtifundum" þar sem þær fengu ekki neitt, en þar sem ég er að greiða þetta allt úr eigin vasa sé ég mér ekki fært að verðlauna allar en þá er er spurning að sleppa bara þessum verðlaunagjöfum.  Að sjálfsögðu er alveg hægt að halda svona skemmtanir án þess að hafa endilega einhver verðlaun, það er í sjálfu sér verðlaun að fara upp og fá að sýna, syngja og dansa.  Þetta verður allavega tekið til athugunar fyrir næsta skemmtifund.

Athugiðtelpurnar fóru heim með blað með sér en við gáfum okkur smá tíma til að fara yfir hvað er framundan, aðeins um mótin í sumar o.fl. o.fl. ef dóttir ykkar hefur ekki komið með blaðið heim þá getur hún fengið nýtt hjá mér á næstu æfingu.

Sjáumst hressar á laugardaginn og svo er æfingaleikurinn á miðvikudaginn 

Við fengum aukaæfingatíma á laugardag sem við getum notað fyrir sér vinkonuæfingu.  Þá höfum við séræfingu á laugardag í Risanum kl. 10:30 - 11:30  - þá megið þið koma með vinkonur á æfingu og er þessi æfing eingöngu fyrir ykkur sem koma með vinkonu með ykkur. 

Æfing er síðan eins og venjulega kl. 12 - 13 í Víðistaðaskóla fyrir þær sem ekki mættu um morguninn en það má alveg líka mæta á þá æfingu, ef þið hafið ekki hreyft ykkur nóg.

Æfing á miðvikudag kl. 5 í Risanum eins og venjulega en á fimmtudag er -

skemmtifundur í Sjónarhóli í Kaplakrika kl. 5 - 7.  Við förum yfir hvað er framundan á vorönninni, tölum um æfingarnar, æfingaleiki og mót sem við ætlum að taka þátt í í sumar og fleira og fleira.  Fljótlega verður svo foreldrafundur og kynnum við þá áætlunina fyrir þeim.  Að sjálfsögðu eyðum við ekki miklum tíma í umræður því þegar því er lokið er komið að ykkur að skemmta hvor annari með skemmtiatriðum - söng, leikriti, gátum eða hverju sem ykkur dettur í hug.  Af því að við erum svo hraustar og viljum vera enn hraustari þá verður áhersla lögð á að koma með eitthvað hollt með sér á þennan skemmtifund - ávexti, grænmeti, safa og hvað sem ykkur dettur í hug - allar koma með á hollustuhlaðborð og svo fáum við okkur af því á milli atriða - frábært, ég hlakka svo til

Allar að byrja að æfa skemmtiatriði - það verða veitt verðlaun fyrir 5 flottustu atriðin - það verða 3 dómarar sem velja. 

Bingónefnd:  það kom upp hugmynd að halda bingó með stelpunum þar sem foreldrar tækju sig til og söfnuðu vinningum og fljótlega myndum við hafa bingó með þeim, foreldrum og ættingjum.  Við gætum svo notað ágóðan til að gera eitthvað skemmtilegt saman.  Ef þið hafið tök á að fá vinninga eða hafið tíma til að fara af stað og "sníkja" þá endilega hafið samband við hana Kolbrúnu (mömmu Emblu) í síma 8211397.

8.fl. næsta æfing hjá ykkur verður á laugardaginn kl. 1 - 2 og að sjálfsögðu megið þið taka vinkonur ykkar með og leyfa þeim að prófa - sjáumst hressar

Það er auðvitað allt á kafi í snjó uppá gervigrasi og þá var spurningin hvað við ættum að gera í staðinn á morgun - fimmtudag og braust út almenn gleðihróp þegar nefnt var hvort við ættum að hafa snjóþotuæfingu. Það verður s.s. snjóþotuæfing í brekkunni fyrir framan Víðistaðakirkju frá kl. 5 - 6 og að sjálfsögðu er allri fjölskyldunni boðið að taka þátt

Það fóru margar heim með boðsmiða af æfingunni í dag, þar sem þær ætla að bjóða vinkonu sinni á æfingu og höfum við hugsað okkur að nota næstu miðvikudagsæfingu fyrir sérstaka vinkonuæfingu.  Að sjálfsögðu mega þær alltaf bjóða með sér áhugasömum stelpum en þarna ætlum við að hafa æfingu þar sem þær sem taka með sér vinkonu eru saman og þá er dálítið mikið stílað inná leiki og gaman.  Ég kem með fleiri miða á morgun ef það eru einhverjar sem vilja fá miða en fengu ekki.

 

Sæl verið þið, það er leiðinlegt að tilkynna að æfingin sem vera ætti í Risanum í dag fellur niður vegna ófærðar og kulda í húsinu - við sjáumst hressar á laugardag.  Endilega látið vinkonur ykkar vita svo þær séu ekki að fara fýluferð

7.fl. þær sem eru að fara á æfingu með strákunum - ég veit að það er æfing hjá þeim og þið verðið bara að meta það hvort þið náið að halda á ykkur hita í þessum kulda, annars takið þið ykkur bara frí og við sjáumst hressar á morgun

Það var aldeilis gaman að hitta ykkur allar á æfingu á laugardag en það var ekki laust við að margar voru orðnar dálítið þreyttar að æfingu lokinni svona er að fá svona langt frí, það tekur smá tíma að ná upp sömu færni.

Næstu æfingar eru:

8.flokkur í Risanum kl. 17 á þriðjudag - muna að klæða sig roooooooosavel

7.flokkur, æfing í Risanum kl. 16 á þriðjudag - þær sem æfa með strákunum, annars á miðvikudag kl. 17 í Risanum og svo sjáum við til með æfinguna á gervigrasinu á fimmtudag, ef það verður ekki gott fótboltaveður fáum við kannski að stinga okkur inn í Risann - við sjáum það þegar nær dregur og þið fylgist vel með á blogginu eins og venjulega

Við óskum ykkur öllum gleði og farsældar á nýja árinu og vonandi eigum við eftir að eiga saman fjöldan allan af ánægjustundum eins og á síðasta ári.

Þið eruð vonandi búnar að eiga góðar stundir með fjölskyldunni og nú styttist í að við fáum að hitta ykkur aftur því næstu æfingar eru á laugardaginn í Víðistaðaskóla - þá er:

7. flokkur kl. 12 - 13 og

8. flokkur kl. 13 - 14

Við hlökkum mikið til að hitta ykkur og hver veit nema að það komi leynigestur á æfinguna Sjáumst allar hressar og kátar

Á morgun - laugardag eru síðustu æfingar hjá 7. og 8. flokki fyrir jólafrí.